30/08/2013

Te passa pe 'coppa, 'sta vita, 
comm'a n'aquila, o nu carrarmato:
te vede o nun te vede, ha da passà. 

Te dumande: "Pecché nun se po' 'ffà?", 
e pierde 'e juorne tanto 'ntussecato 
ca se fa niro pure 'o grigio 'e 'sta matita. 

Quanta vote 'e scigliuto 'e lassà perdere 
primma ancora 'e capì ca nun putive vencere 
ch'e suonne 'ncatenati 'e penziere tuoje? 

Quanta scale 'e fatto a 'ddoje a 'ddoje 
pe scanzià uocchie e te ne fujere 
luntano d'ammore ca nun se fira 'e correre? 

Quanti 'mmane tuccate nun sapevano 'e niente 
tra cunsigli vacanti, recchie meze sorde 
'e chi ce sente 'bbuono sulo quanno vò alluccà? 

Eppure quanta cose t'o 'ffanno scurdà:
criature ca ridono, cumpagne ca tornano, 
'a mamma ca te cresce, 'o cane ca t'attende! 

'O tiempo nun se po' allungà, né cagnà, 
quann'è fernuto a te, accummengia a n'ato... 
pienze pure a chesto diman'e matina, 

ca te passa pe 'coppa, 'sta vita, 
comm'a n'aquila, o nu carrarmato:
'a vide o nun 'a vide, sta passanno 'ggià.